Þetta verk eftir Snædísi Högnadóttur, er innblásið af okkar fjórum árstíðum sem endurtaka sig ár eftir ár. Fannhvít, töfrandi þekja breiðir úr sér, börnin fara út í leik. Smám saman bráðnar fönnin og gróðurilmurinn fer að vekja upp hamingjuríkar minningar. Allt grænt lifnar við, dagarnir verða bjartari og brosin breiðari. Sólin skilur eftir sig rauðari kinnar og Eyrarrósin fær loks að skarta sínu prýðasta, þó aðeins í stutta stund. Haustlitirnir vekja upp undrun og á augnabliki verður jörðin aftur hvít. Hringrás árstíðanna hefst að nýju.